रखडलेल्या ‘लाडक्या बहिणीं’चा मार्ग मोकळा; बँक खात्यात टप्प्याटप्प्याने जमा होणार पैसे!
हिंगोली ( प्रतिनिधी ) :
मागील काही महिन्यापासून मुख्यमंत्री लाडकी बहीण योजने अंतर्गत पात्र महिलांना लाभ मिळत नसल्याचे निदर्शनास आले होते या अनुषंगाने प्रशासनाने यावर टप्प्याटप्प्याने सर्व लाभार्थींना हप्ता मिळणार असल्याचे सूचित केले आहे
मुख्यमंत्री माझी लाडकी बहीण योजनेअंतर्गत मार्च व एप्रिल २०२६ या महिन्यांचे हप्ते इ-केवायसी प्रक्रिया पूर्ण करूनही काही लाभार्थी महिलांच्या बँक खात्यात जमा झालेले नाहीत. मात्र, शासन स्तरावर आवश्यक तांत्रिक प्रक्रिया सुरू असून पात्र महिलांच्या खात्यात येत्या काही दिवसांत टप्प्याटप्प्याने रक्कम जमा करण्यात येणार असल्याची माहिती जिल्हा महिला व बाल विकास कार्यालय, हिंगोली यांनी दिली आहे.
दरम्यान, मागील सहा महिन्यांपासून लाभ प्राप्त न झालेल्या लाडक्या बहिणींनी सोशल मीडियावरील अथवा इतर अफवांवर विश्वास ठेवू नये, तसेच कोणत्याही प्रकारची अनावश्यक गर्दी करू नये, असे आवाहन प्रशासनाच्या वतीने करण्यात आले आहे.
